كــل فــولــة ولـهـــا كـيــّـال

- فيه اللي بيفضّل مراته

تكون مخها محدود

ويروح يعيش حياته ,

ويقول أديني جبت اللي تراعي البيت والعيال .

- وفيه اللي عايزها من بره منظر

يفرج الناس عليه

ومن جوه فاضي ,

ومش همه غير قال إيه الجمال .

- وفيه اللي بيختارها حبيبته

وصحبته اللي تفهمه

وتشاركه في رأيه وفي كل حياته بجد ,

ومتفاهمين في أي كلمة تتقال .

- وفيه اللي عايز أي واحدة والسلام

ولا يعرفها ولا عمره شافها

وأهله يرشحوهاله ,

ويقول موافق حلو أوي شغال .

- وفيه اللي يشوف أي واحدة

, معدية بالصدفة البحتة

وفي نظره دي تنفع ودي تنفع ..

وكله عنده ينفع ,

من غير تفكير ولا حتى سؤال .

- وفيه اللي يسأل واحد معرفته ..

على عروسة لُقطة على ضمانته

ويقول له أمال عندي ..

بنت فلان معرفتي ..

خُدها وعلى ضمانتي

كإنه بيشتري غسالة وعليها طقم تيفال .

يعني صحيح المثل اللي إتـقــال ,,

,, كــل فــولــة ولـهـــا كـيــّـال

و زي ما رسولنا الكريم قال ..,

إنكح ذات الدين والمال والحسب والجمال

ويا حظه اللي يلاقي واحدة فيها كل ده ..

دي فوق راسه المفروض تتشال

وأهم حاجة تكون بنت حلال

أصلها مش بيعة وشروة ..

ده مستقبل ومصير وبناء أجيال .

.

.

كل فولة ولها كيّال

لــ نـورا خشبـة