الـدنـيــا

عمّالين نشتكي مــ الدنيا
في كل لحظة وكل ثانية
ولو بسبب أو من غير
الشكوى نازلة زي السير
سواء إديتنا .. مديتناش
زعلتنا .. مزعلتناش
إشتكي .. ما الشكوى ببلاش
ونتخاصم ونتخانق
ونتشائم .. ماهوش فارق
ومصعبينها على نفسنا
ونشيّل بعض همنا
ونزوّد بإيدينا حملنا
وهي ماتستاهل حتى دمعنا
الدنيا أبسط من كده بكتير
بُص حواليك هتلاقي الخير
ماتفكرشي ..
وتقول يا ترى إيه هيحصل !!
ولا تقولشي ..
مصيري لفين هيوصل !!
وماتسألشي ..
لإمتى هتفضل أحلامي ماتتحققشي !!
ونفتكر أبونا آدم لما خرج مــ الجنة
ونزعل أوي إنه مفضلش فيها وإستنى
ونسينا حكمة ربنا في إختبارنا
وإختبار الصبر جوانا حتى في أحلامنا
مش كله بيتحقق في يوم وليلة
ولا كل الأيام بتعـدي جميلة
الحلم نفسه حكمة
حكمة لوجودنا ونعمة
ربنا خلقنا إنسـان
بنتـألـم وننسى كمان
ننسى الحُـزن اللي فات
ونستنى حاجات هتكون
حاجات حلمنا بيها ساعات
مـدبـرهـالنا رب الكـون
وعشان نوصل لأحلامنا
لابُـد الصبر يلازمنا
وماتقولش أصلي طبعي مَلُول
وإني إتخلقت ضعيف وعَجُول
ده لولا الحلم .. الدنيا تزول
فكّر فيها هتلقى روحك لنفسك تقول
لو أعرف بكره إيه هيجيب
ولو بعرف في علم الغيب
مكنتش هحلم وأتمنى .

.
.

لــ نـورا خشبـة

:)

سـامـحـنــا يــا رب

سامحنا يا رب غصب عننا
كل الظروف كانت ضدنا
كلها أمواج بتشدنا
وإحنا ليها مِسَلِّمين
صراعنا كان مع نفسنا
مفيش ولا قدوة تدلنا
تايهين في دنيا لوحدنا
مش عارفين الصح فين
كل حاجة حوالينا
بتهد وتحبط فين
وتاخدنا في التيار
كان لازم ليها نضعف
مكناش للصح نعرف
كان صعب الإختيار
جيل قبلنا صغرنا وقلل مننا
ظلمنا بحكمه علينا وحطم حلمنا
خلانا يا دوب عايشين
ملناش رأي وسلبيين
مشونا في طريق مسدود
لا ليه بداية ولا نهاية
كإننا ملناش وجود
ولا كيان ولا هدف ولا غاية
ماليين العالم بطموحنا
وإنت يا رب اللي داري بروحنا
مهما نحاول نتغير
بنلاقي روحنا في مطرحنا
الذنب يا ترى على مين ..!!
على جيلنا إحنا اللي تُوهنا
ولّا ع الجيل اللي تَوِهْنا !!
ولّا الذنب , محسوب يا رب
علينا إحنا الإتنين .

.

.

لــ نورا خشبة

من كتاب كلام موزون

http://www.goodreads.com/book/show/9775195

:)

رغـم إنـي أقـدر

مابقدرش أكون زيكم خبيثة وسليطة اللسان

رغم إني أقدر وفي الإمكان

ღ~ღ

مابعرفش أبُخ في وشُكم كلام زي سم التعبان

رغم إني أقدر وفي الإمكان

ღ~ღ

ويمكن ببان ضعيفة , بس ده مش ضعف

دي قوة في روحي ماتتوصفش

ღ~ღ

وكإن ربنا مش عايزني أبقى زيكم ,

أو أتطبع بطبعكم ,

أو أشوه براءتي بذنبكم

لأي سبب أياً كان .

.

.

لــ نورا خشبة

من كتاب كلام موزون

http://www.goodreads.com/book/show/9775195

:)

مش هنحتاج تاني لثورات

قالوا هنصْلِح أرض بلادي

هنطّهّر تطهير مش عادي

وصوتنا معاهم كان بينادي

صوت واحد وشعب إتحادي

قالوا هنبدأ برؤوس القمة

رؤوس الفساد اللي مالهم ذمة

وهترجع لينا بلدنا عظيمة

بشبابها وكله عزيمة وهِمَه

قالوا هتبقى الخطوة الأولى

بعدها هنلاقي شهامة ورجولة

قولنا خلاص دُول فهموا الفولة

وأي غلطة دي مش معقولة

فجأة لقينا صراع بين شعب

خِلاف وإهانة وشتيمة وسب

والحكايـة إتقـلبت قَـلْـب

طب يرضي مين ده بس يا رب

الأخلاق بقت في النازل

وبقينا نشوف مع بعض مهازل

ولا فاهمين إيه اللي حاصل

خلاص حلينا كل أوجاعنا

وكله عاملّي لرأيه مُناضل !!

ومحتار إنت .. مين تصدق

مين بيكدب ومين بيصدق

آراء كتير تشوف وتسمع

شتّتوا مُخك وإنت مبرّق :|

اللي ضدنا في القايمة السودة

واللي معانا في القايمة البيضا

وبقت بصراحة آخر عيضة

بدل ما نقضي على الأحزاب

زودناهم سـودة وبيـضا !!

طالِبنا ياما بديمقراطية

وطالِبنا ياما بالحرية

وإزاي نحْجِرها وبس علينا

ونمنعها ع الناس التانية !!

طب نبدأ نبني إزاي من فوق

إذا كان القاع مهري ومشقوق

قاع المبـادئ والأخــلاق

أساس وعمود كل بناء

جوّه ضمير أكرم مخلوق

نفسي الأخلاق تبقى أساسنا

هي حياتنا وتاج فوق راسنا

نفسي الكل يصحّي ضميره

ومايقبلش يجرّح غيره

نفسي نكون قابلنا حاجات

نتعلم فيها من اللي فات

لو كل فرد قام دوره بضمير

لو كل فرد عاش بيعمل خير

لو كل فرد مش عايش لنفسه وبس

لو كل فرد باللي حواليه بيحس

لو كل فرد إحترم التاني رغم الإختلافات

لو إهتمينا بالمفيد وبعدنا عن التفاهات

لو كان قدوتنا بجد رسولنا

هنشوف الدنيا بسيطة وجنة

بإختصار في كلمتين لكل الكلمات

.

.

لو كل فرد مننا

من الصغير للكبير عندنا

في كل شئ بيعمله

راعى فيه ربــنـــا ♥

أكيييد أكييييييد أكيييييييييييد

مش هنحتاج تاني لثورات

مش هنحتاج تاني لثورات

مش هنحتاج تاني لثورات

.

.

لــ نورا خشبة

25\2\२०११